Banka Islame

Banka islame ka instrumente financiare dhe politika investuese unike. Bankat islame nuk financojnë projekte që mund të dëmtojnë individët, shoqërinë, mjedisin dhe mirëqenien e brezave të ardhshëm. Rrjedhimisht, banka islame është shumë e lidhur me frymën e Objektivave të Zhvillimit të Qëndrueshëm të Kombeve të Bashkuara, duke e bërë atë tërheqëse jo vetëm për muslimanët, por për të gjithë ata që kanë një qasje etike në procesin e tyre të vendimmarrjes për investime.

Ka prova të forta që kultura, fe dhe shkolla të ndryshme mendimi kritikojnë fajdenë dhe huadhënien me interes. Arsyet për opinione të tilla negative mund të jenë të natyrës hyjnore, etike dhe ekonomike. Në Islam, çdo lloj shfrytëzimi duke përfshirë huadhënien me bazë interesi është i dënuar dhe duhet shmangur. Interesi mund të përkufizohet si një tarifë e paracaktuar që duhet t’i paguajë huamarrësi huadhënësit si kompensim për fondet e marra hua. Shuma e tarifës lidhet drejtpërdrejt me shumën e fondeve të huazuara dhe kohëzgjatjen e periudhës së shlyerjes. Pra, çdo transaksion huadhënieje që fiton interes nga perspektiva islame është problematik.

Për shkak të kësaj ndjenje gjatë shekullit të kaluar, studiuesit dhe praktikuesit e financave në vendet kryesisht myslimane u përpoqën të hartonin modele bankare që do t’u shërbenin nevojave financiare bashkëkohore të individëve dhe bizneseve duke ruajtur vlerat fetare. Ata duhej të ndërtonin një model ku kapitali do të mobilizohej dhe shpërndahej në shoqëri duke fituar fitime, por jo një interes. Instrumentet financiare që janë përfshirë në modelin bankar islam janë nxjerrë nga praktikat profetike që datojnë 14 shekuj më parë. Këto instrumente financiare bazohen kryesisht në parimet e partneritetit, por përfshijnë gjithashtu shitjet e shtyra, qiradhënien, agjencinë dhe financimin e projekteve.

Edhe pse industria bankare islame është relativisht e re, ka më shumë se 1400 institucione financiare islame në mbarë botën. Banka Islamike përfaqëson një nga degët bankare me rritjen më të shpejtë me një rritje mesatare vjetore prej 17.6%. Megjithatë, është ende një fenomen margjinal pasi përbën vetëm 0.7% të totalit të aseteve botërore me një vlerë totale asetesh ekuivalente me 3 trilion dollarë.

Për të mësuar më shumë rreth Bankingut Islamik, Banka e Bashkuar e Shqipërisë ka sponsorizuar përkthimin e librit të famshëm të titulluar “Hyrje në Financat Islame” nga Muhamed T. Usmani, i cili mund të shkarkohet më poshtë.